Рождество честного славного Пророка, Предтечи и Крестителя Господня Иоанна
7 июля по н.ст. (24 июня по ст.ст.)
Тропарь Предтечи
глас 4
Проро́че и Предте́че прише́ствия Христо́ва, досто́йно восхвали́ти тя недоуме́ем мы, любо́вию чту́щии тя: непло́дство бо ро́ждшия и о́тчее безгла́сие разреши́ся сла́вным и честны́м твои́м рождество́м, и воплоще́ние Сы́на Бо́жия ми́рови пропове́дуется.
Кондак Предтечи
глас 3
Пре́жде непло́ды днесь Христо́ва Предте́чу ражда́ет, и той есть исполне́ние вся́каго проро́чества: Его́же бо проро́цы пропове́даша, на Сего́ во Иорда́не ру́ку положи́в, яви́ся Бо́жия Сло́ва проро́к, пропове́дник, вку́пе и Предте́ча.
Величание
Велича́ем тя, Предте́че Спа́сов Иоа́нне, и чтим е́же от непло́дове пресла́вное рождество́ твое́.
Усекновение главы Пророка, Предтечи и Крестителя Господня Иоанна
11 сентября по н.ст. (29 августа по ст.ст.)
Тропарь Предтечи
глас 2
Па́мять пра́веднаго с похвала́ми, тебе́ же довле́ет свиде́тельство Госпо́дне, Предте́че: показа́л бо ся еси́ вои́стинну и проро́ков честне́йший, я́ко и в струя́х крести́ти сподо́бился еси́ Пропове́даннаго. Те́мже за и́стину пострада́в, ра́дуяся, благовести́л еси́ и су́щим во а́де Бо́га, я́вльшагося пло́тию, взе́млющаго грех ми́ра и подаю́щаго нам ве́лию ми́лость.
Кондак Предтечи
глас 5
Предте́чево сла́вное усекнове́ние смотре́ние бысть не́кое Боже́ственное, да и су́щим во а́де Спа́сово пропове́сть прише́ствие. Да рыда́ет у́бо Ироди́я, беззако́нное уби́йство испроси́вши: не зако́н бо Бо́жий, ни живы́й век возлюби́, но притво́рный, привре́менный.
Величание
Велича́ем тя, Крести́телю Спа́сов Иоа́нне, и почита́ем вси честны́я твоея́ главы́ усекнове́ние.
Зачатие честного, славного Пророка, Предтечи и Крестителя Господня Иоанна
6 октября по н.ст. (23 сентября по ст.ст.)
Тропарь Предтечи
глас 4
Пе́рвее неражда́ющая непло́ды, возвесели́ся, се́ бо зачала́ еси́ Со́лнца свети́льника я́ве, просвеща́ти иму́ща всю́ вселе́нную, слепото́ю неду́гующую. Лику́й, Заха́рие, вопия́ со дерзнове́нием: проро́к Вы́шняго е́сть хотя́й роди́тися.
Кондак Предтечи
глас 1
Весели́тся све́тло Заха́рия вели́кий со всесла́вною Елисаве́тию сопру́жницею, досто́йно зачина́юще Иоа́нна Предте́чу, его́же Арха́нгел благовести́, ра́дуяся, и челове́цы достодо́лжно почти́м, я́ко таи́нника благода́ти.
Величание
Велича́ем тя, Предте́че Спа́сов Иоа́нне, и чти́м е́же от непло́дове пресла́вное зача́тие твое́.
Собор Предтечи и Крестителя Господня Иоанна
20 января по н.ст. (7 января по ст.ст.)
Тропарь Предтечи
глас 2
Па́мять пра́веднаго с похвала́ми, тебе́ же довле́ет свиде́тельство Госпо́дне, Предте́че: показа́лбося еси́ вои́стинну и проро́ков честне́йший, я́ко и в струя́х крести́ти сподо́бился еси́ Пропове́даннаго. Те́мже, за и́стину пострада́в, ра́дуяся, благовести́л еси́ и су́щим во а́де Бо́га, я́вльшагося пло́тию, взе́млющаго гре́х ми́ра и подаю́щаго на́м ве́лию мило́сть.
Кондак Предтечи
глас 6
Плотска́го Твоего́ прише́ствия убоя́вся, Иорда́н стра́хом возвраща́шеся; проро́ческое же служе́ние исполня́я, Иоа́нн тре́петом спря́ташеся; А́нгельския чи́ни ужаса́хуся, зря́ще Тя, во струя́х пло́тию креща́ема; и вси́, су́щии во тьме́, озаря́хуся, воспева́юще Тя, я́вльшагося и просвети́вшаго вся́.
Величание
Велича́ем тя, Предте́че Спа́сов Иоа́нне, и почита́ем вси всечестны́й собо́р тво́й.
Первое (IV) и второе (452) обретение главы Иоанна
9 марта по н.ст. (25 февраля по ст.ст.)
Тропарь Предтечи
глас 4
От земли́ возсия́вши, Предте́чева глава́ лучи́ испуща́ет нетле́ния ве́рным исцеле́ний, свы́ше собира́ет мно́жество А́нгел, до́ле же созыва́ет челове́ческий ро́д единогла́сную возсыла́ти сла́ву Христу́ Бо́гу.
Кондак Предтечи
глас 6
Проро́че Бо́жий и Предте́че благода́ти, главу́ твою́, я́ко шипо́к свяще́ннейший, от земли́ обре́тше, исцеле́ния всегда́ прие́млем, и́бо па́ки, я́коже пре́жде, в ми́ре пропове́дуеши покая́ние.
Величание
Велича́ем тя, Крести́телю Спа́сов Иоа́нне, и почита́ем вси́ честны́я твоея́ главы́ обре́тение.
Третье (ок. 850) обретение главы Предтечи и Крестителя Господня Иоанна
7 июня по н.ст. (25 мая по ст.ст.)
Тропарь Предтечи
глас 4
Я́ко Боже́ственное сокро́вище, сокрове́нное в земли́, Христо́с откры́ главу́ твою́ на́м, проро́че и Предте́че. Вси́ у́бо, соше́дшеся в сея́ обре́тение, пе́сньми богоглаго́ливыми Спа́са воспои́м, спаса́юща на́с от тле́ния моли́твами твои́ми.
Кондак Предтечи
глас 6
Светоявле́нный и Боже́ственный в ми́ре сто́лп, со́лнца свети́льник, Предте́ча, главу́ светоно́сную и Боже́ственную свою́ показа́вый в конце́х, освяща́ет то́й ве́рно покланя́ющихся и взыва́ющих: Христо́в прему́дрый Крести́телю, спаси́ все́х на́с.
Величание
Велича́ем тя, Крести́телю Спа́сов Иоа́нне, и почита́ем вси́ честны́я твоея́ главы́ обре́тение.
Перенесение десной руки Иоанна Предтечи (1799)
25 октября по н.ст. (12 октября по ст.ст.)
Тропарь на перенесение десной руки Иоанна Предтечи
глас 4
От за́пада возсия́вши Предте́чева рука́, лучи́ испуща́ет нетле́ния ве́рным исцеле́ний, свы́ше собира́ет мно́жество А́нгел, до́ле же́ созыва́ет челове́ческий ро́д, единогла́сно возсыла́ти сла́ву Христу́ Бо́гу.
Кондак на перенесение десной руки Иоанна Предтечи
глас 6
Умнаго Со́лнца свети́льник Боже́ственный Предте́ча, показа́вый в конце́х светоно́сную свою́ десни́цу, ны́не на се́вере озаря́ет е́ю блаже́нное Оте́чество на́ше, просвеща́я и освяща́я ве́рно покланя́ющихся, и Христу́ вопию́щих: спаси́ на́с моли́твами проро́ка Твоего́, Царю́ Вы́шний.
Величание
Велича́ем тя, Крести́телю Спа́сов Иоа́нне, и почита́ем вси́ честны́я твоея́ руки́ пронесе́ние.
